“Ювентус” катта йўқотиш арафасида турибди

“Ювентус” раҳбарияти асосий ўйинчилардан ҳисобланган Федерико Кьезани янги шартномага кўндира олмаяпти. Бунга ўзига яраша сабаблар бор.

Биринчи навбатда, Федерико Кьеза “Ювентус” лойиҳаси муваффақиятли эканига ишонмаяпти. Бундан ташқари, унинг бош мураббий Массимилиано Аллегри билан муносабатлари яхши эмас.

Кьеза мавсум давомида жароҳати туфайли кўп ўйинларни ўтказиб юборди. Бироқ майдонга тушган учрашувларда жамоанинг асосий фигурасига айлана олади.

Аллегри уни ҳужум чизиғида доимий ўйнатмаётгани ва позициясини кўп ўзгартираётгани Кьезага ёқмаяпти.

Шунингдек, масаланинг асосий қисми молиявий талабларга тегишли. Клуб хўжайинлари Федерико билан яхши муносабатда бўлишига қарамай, маошни ҳозир берилаётган 5,5 миллион евродан оширмоқчи эмас.

Агар томонлар тез орада келишувга эришмаса, футболчи ёзда трансферга қўйилади. Чунки Кьезанинг амалдаги битими бир йилдан кейин тугайди. Ёзда сотиб юборилмаса, қимматбаҳо юлдуз бепул кетиб қолиши мумкин.