Ro‘ziqul Berdiev: Chempionlarni ham shoshirib qo‘ydik

Superliga 24-turidan o‘rin olgan "Nasaf" hamda "Paxtakor" jamoalari o‘rtasidagi o‘yindan so‘ng qarshiliklar ustozi Ro‘ziqul Berdiev bellashuv borasidagi o‘z fikrlarini bildirib o‘tdi.

"Birinchi bo‘limda ozroq sust harakat qildik. Rejamiz bo‘yicha qarshi hujumlarda harkat qilishimiz kerak edi. Bir necha vaziyatlar ham yarata oldik ammo ulardan foydalana bilmadik. Buning ustiga ketma-ket ikkita gol o‘tkazib yubordik.

Ikkinchi bo‘limda vaziyatni o‘zgartirishga harakat qildik.  Birinchi bo‘limdan farqli o‘laroq ikkinchi bo‘limda ko‘rsatgan o‘yinimiz muxlislarga manzur bo‘ldi deb o‘ylayman. Chempion jamoani ham shoshirib qo‘ydik. Lekin raqibimiz salohiyati va mahorati jihatidan bizdan ustun. Shuning uchun ular bugun g‘alabaga erishishdi. Chempion jamoaga qarshi munosib o‘ynashga harakat qildik. Buning uchun futbolchilarga va bizni qo‘llab-quvvatlab turgan muxlislarga minnatdorchilik bildiraman", - deb Berdievning so‘zlarini keltirib o‘tdi klub rasmiy sayti.