Namanganda vodiy derbisi kutmoqda. Jamoalarning statistikasi qanday?

28 mart oqshomida barchamizning e’tiborimiz Namanganda o‘tadigan vodiy derbisiga qaratilishi shubhasiz. Turning markaziy uchrashuviga har doimgidek ortiqcha afishaning ham hojati yo‘q.

Barchaga ma’lumki, har qanday vaziyatda ham “Navbahor” va “Andijon” jamoalari o‘rtasidagi bellashuv anshlag holatda, jiddiy qarama-qarshilik ruhi ostida o‘tadi.

O‘tgan yilgi “dahshatli” o‘yinlar barchaning yodida ekanligi tabiiy. O‘zbekiston Kubogining unutilmas finali bunga yorqin misol bo‘la oladi.

2024 yilgi mavsumda “Andijon” Kubokdagi betakror g‘alabadan tashqari Superliga doirasida ham muxlislarini xursand qila olgan. “Bobur arena”dagi bellashuvda “Navbahor” 3:0 hisobida taslim etilgan bo‘lsa, Namangandagi bahsda jangovar durang kuzatilgan – 3:3.

Hisob bo‘yicha “Navbahor” va “Andijon” klublari milliy chempionatimizda 56 bor kuch sinashishgan. Namanganliklarda 27, andijonliklarda esa 13 g‘alaba bor. Yana 16 ta o‘yinda kuchlar teng kelgan. To‘plar nisbati 80-57 “Navbahor” foydasiga.

“Andijon” Namangandan 2021 yilgi mavsumda 0:1 hisobidagi g‘alaba bilan qaytgan va hozircha bu “Burgutlar”ning “Navbahor” maydonidagi yagona muvaffaqiyati bo‘lib turibdi. 

Eslatib o‘tamiz, “Navbahor” – “Andijon” bellashuvi 28 mart kuni, Namangandagi “Markaziy” stadionda soat 19:30 da boshlanadi.