"Manchester Siti"ning etakchi futbolchilaridan biri "Barselona"ga o‘tmoqchi

Mundo Deportivo nashrining xabar berishicha, "Manchester Siti" yarim himoyachisi Bernardu Silva shu yoz jamoasini o‘zgartirishi mumkin.

Yuqoridagi manbaga ko‘ra, 26 yoshli portugaliyalik futbolchi "Atletiko"dan taklif olgan, ammo u "Barselona"ga o‘tishni xohlayapti. O‘z navbatida kataloniyaliklar ham Bernarduning o‘yinlariga befarq emas.

Qayd etilishicha, Silvaga Barselona shahri juda yoqadi, u tez-tez bu shaharga tashrif buyuradi. U Pep Gvardiola boshqargan “Barsa”ning o‘yinlarini tomosha qilib katta bo‘lgan, shuning uchun ham u Kataloniya klubida o‘ynashni orzu qiladi. Bernardu Silva allaqachon o‘zining bu istagini Gvardiolaga ma’lum qilgan.

Silva o‘tgan mavsum APLda 26 ta o‘yinda maydonga tushdi va o‘z hisobiga 2 ta gol hamda 6 ta golli uzatma yozdirib qo‘yishga erishdi.