Hamidjon Aktamov "Qizilqum"ni tark etdi, klub jarimaga tortiladi

Navoiyning “Qizilqum” klubida bosh direktor sifatida ishlab kelayotgan Hamidjon Aktamov shu yilning 18 mart kuni o‘z arizasiga ko‘ra ishdan ketgan. Bu haqda klub oradan 18 kun o‘tib — 5 aprel kuni ma’lumot berdi.

“2022 yilgi mavsumda O‘zbekiston Professional futbol ligasi tomonidan o‘tkaziladigan musobaqalar reglamenti”ning 8.4-bandida klub o‘z rasmiysi bilan tuzilgan mehnat shartnomasini bekor qilsa, O‘zPFL uch kun ichida bu haqda yozma ravishda ogohlantirilishi hamda ozod etilgan shaxs litsenziyasi O‘zPFLga topshirilishi lozim ekani ko‘rsatilgan. Shuningdek, “Litsenziyalash reglamenti”ning P.14 mezoni 3-bandida shunday yozilgan: “Litsenziya talabgori lavozimning bo‘shab qolganligi va ushbu lavozimda yangi mutaxassis ish boshlagani to‘g‘risida ko‘pi bilan etti (7) ish kuni ichida O‘zPFLni xabardor qilishi zarur”.

Shunga qaramay, “Qizilqum” na o‘z rasmiy sahifalarida va na xat orqali bu haqda rasmiy ma’lumot taqdim etdi. Shundan kelib chiqib, “Qizilqum” futbol klubi jarimaga tortiladi. O‘zPFL qolgan klublarni ham jamoatchilik uchun ochiq bo‘lishga hamda o‘z muxlislarini klubga tegishli ma’lumotlardan vaqtida xabardor qilishga chaqiradi.

Ma’lumot uchun, “Qizilqum” futbol klubi O‘zPFLga taqdim etgan xatida Hamidjon Aktamovning sport ishlari bo‘yicha o‘rinbosari Alisher Xoliqov direktor vazifasini bajarayotganini qayd etgan. 

O‘zPFL matbuot xizmati