Falastin bosh murabbiyi: Ertaga g‘alaba qozonsak, keyingi bosqichga chiqish imkoniyatini saqlab qolamiz

Xabaringiz bor, ertaga O‘zbekiston milliy terma jamoasi JCh-2022 ikkinchi saralash bosqichidan o‘rin olgan Falastinga qarshi o‘yin o‘tkazadi. Ushbu bellashuv oldidan bugun ikki jamoa murabbiylari o‘rtasida matbuot anjumani o‘tkazildi. Unda mehmonlar ustozi Nuriddin Ould Ali ishtirok etdi.

- Ertangi uchrashuv ikki jamoa uchun ham juda muhim. Ikki jamoa ham oldingi turdagi mag‘lubiyatni unitishga harakat qiladi. Ertaga 2 jamoa ham g‘alaba uchun maydonga tushadi va jamoalar keyingi bosqichga o‘tishga intiladi. Lekin o‘yin qiyin o‘tadi.

O‘zbekiston milliy terma jamoasi juda kuchli. Birinchi o‘yinda g‘alaba qozonganmiz. Endi ham raqibning kuchliligini bilgan holda 3 ochkoni qo‘lga kiritishga intilamiz. Shuning uchun ertaga haqiqiy jang bo‘ladi deb o‘ylayman.

O‘zbekiston terma jamoasi uyda o‘ynashi ustunlik beradi. Ularda murabbiy almashdi, lekin futbolchilar o‘sha-o‘sha. Hozirgi kunda hamma terma jamoa bir-biri haqida ma’lumotga ega. Nimanidir yashirish qiyin. Bo‘lajak raqibimizning eng kuchli jihatlari va futbolchilarini yaxshi bilamiz. O‘zimiz ertaga oxirgi uchrashuvimizdan-da yaxshiroq o‘yin namoyish etishga urinamiz. Ertangi maqsadimiz faqat 3 ochko. Shundagina keyingi bosqichga chiqish imkoniyatini saqlab qolamiz. 

Tabiiy maydonda o‘ynash bo‘yicha hech qanday muammo yo‘q. Maydonning holati yaxshi bo‘lsa biz tayyormiz. Ertangi o‘yinga har tomonlama tayyor bo‘lishimiz lozim. 

Ayni paytda biz O‘zbekiston milliy terma jamoasi bilan bir xil holatdamiz. Shuning uchun bizni ertaga faqat g‘alaba qoniqtiradi. Lekin raqibimiz kuchliligi uchun ertaga 3 ochkoni jamg‘arishimiz qiyin bo‘ladi.

Biz O‘zbekistonga ertaroq keldik. Chunki ob-havoga ko‘nikish uchun. Mashg‘ulotlar o‘tkazdik. Shuning uchun ob-havo muammo bo‘lmaydi, - dedi murabbiy.