Холанд “меҳмондўстлик”ни ёмон кўради

Англия Премьер-лигасининг тўртинчи тури Манчестер дербиси билан якунланди. Ўйинга мезбонлик қилган “шаҳарликлар” рақиб дарвозасига жавобсиз учта тўп киритди.

Абдуқодир Ҳусанов тўлиқ ўйнаб, ҳимояни мустаҳкам ушлаб берган учрашувда Фил Фоден ҳисобни очган бўлса, Эрлинг Холанд “Юнайтед” дарвозасини икки бор ишғол қилди.

OptaJoe статистик марказининг маълум қилишича, Холанд “Манчестер Сити” таркибида “Этихад” аренада 50-ўйинини ўтказиб, ўз мухлислари гувоҳлигида урган голлари сонини ҳам 50 тага етказиб олди.

Англия чемпионатлари тарихида ўз майдонида 50 та голни энг тез киритиш бўйича Холанд машғур юлдуз Алан Ширердан кейин иккинчи ўринни қайд этди. Ширерга 50 та гол уриш учун 47 та учрашув кифоя қилган.

Шунингдек, профессионал фаолиятида 1988-2006 йиллар давомида “Саутгемптон”, “Блэкберн Роверс” ва “Ньюкасл Юнайтед” шарафини ҳимоя қилган Алан Ширер жами 260 та гол урган ва бу Англия чемпионатларининг мутлақ рекорди ҳисобланади.