Винисиуснинг душмани “Реал”га ўтишга тайёрлигини билдирди

Испаниянинг “Мальорка” клуби ўнг қанот ҳимоячиси Пабло Маффео “Реал” ҳужумчиси Винисиус жуниор билан очиқдан очиқ душманчилиги билан танилган.

Бундан ташқари, аргентиналик футболчи “Қироллик клуби”нинг бир неча ўйинчилари билан зиддиятга борган. Шунга қарамай, Маффео агар таклиф бўлса, Мадрид суперклубига кўчиб ўтишга тайёр эканини билдирди.

- Албатта, таклиф бўлса, ўтаман. Футболчилар учун рад этиб бўлмас клублар бўлади. “Реал” ана шундай жамоалардан бири, - деди Пабло Маффео.

28 ёшли Маффео “Манчестер Сити” тарбияланувчиси ҳисобланади. “Шаҳарликлар” асосий таркибидан муқим жой ола билмаган ҳимоячи фаолияти давомида “Жирона”, “Штутгарт”, “Уэска” жамоаларида ўйнаган.

“Мальорка” тажрибали ҳимоячини 2022 йилнинг ёзида “Штутгарт”дан 3 миллион еврога сотиб олган. Унинг клуб билан шартномаси 2027 йилнинг 30 июнигача тузилган.