Венгер: "Барса "тишсиз бўри"га айланиб қолди"

"Арсенал" собиқ бош мураббийи Арсен Венгер "Реал" нима сабабдан "Барселона"ни мағлуб этгани ҳақида гапирди. 

"Айтишим мумкинки, Хаби Алонсо бугунги кунда жамоасини анчагина мувозанатга келтирди ва умуман олганда баъзи жиҳатларда рақибдан анча тартибли ўйнади. 

Масалан, "қаймоқранглилар"нинг ҳимоядаги ўйини "Барселона"никидан анча кучли эди. Ҳужумда мадридликлар ҳар бир вазиятидан гол урадигандек кўринарди. Каталонияликлар эса Левандовски ва Рафиньясиз тишсиз бўрига айланиб қолди. Иккинчи бўлимда Мбаппе пенальтидан фойдалана олмаганидан кейин "Барса" тўпни кўпроқ назорат қилди, аммо гол урадигандек кўринмади. 

Алонсо "Реал"нинг ҳимоя чизиғини жуда яхши мувозанатга келтирди. Бунинг учун уни олқишлаган бўлардим. Ҳамма ўзининг жамоасини тартибга келтиришга ва руҳлантиришга ҳаракат қиляпти. Бу икки клуб ҳам олдига катта мақсадлар қўйган ва бу учрашув улар учун синовнинг бошланиши бўлиши мумкин", - деди Венгер.

Маълумот учун, Ла лиганинг 10- туридан сўнг мадридликлар 27 очко билан пешқадам бўлиб турган бўлса, "Барселона" 22 очко билан иккинчи поғонани банд этиб турибди.