Умиджон Эргашев: "Чемпионлик йўлидаги курашда ОКМКни ютишимиз шарт"

Ўзбекистон Суперлигасининг 13-туридан ўрин олган  “Навбаҳор” – ОКМК жамоалари ўртасидаги учрашув арафасида “лочинлар”нинг 26 ёшли маҳоратли дарвозабони Умиджон Эргашев клуб матбуот хизматига бўлажак баҳс ҳақидаги фикрлари билан ўртоқлашди. 

"ОКМКга қарши кечадиган ўйиннинг томошабоп бўлишига ишончим комил. Боиси, ҳар икки жамоа чиройли футбол намойиш этади. Бўлажак учрашув кескин курашларга бой тарзда кечади, деб ўйлайман. 

Чемпионлик йўлидаги курашни давом эттиришимиз учун олмалиқликлар билан бўладиган ўйинда ғалаба қозонишимиз шарт. Чунки фақатгина ютуқ бизни чемпионлик пойгасига қўшилишимизни таъминлайди. Буни жамоамиз аъзоларининг барчалари жуда яхши ҳис қилиб туришибди ва бўлажак баҳсга жуда яхши тайёргарлик кўрдик. 

Мақсадимиз шанба оқшомида “Марказий” стадионига ташриф буюрадиган мухлисларга қувонч улашиш. Бизни ғалабадан бошқа натижа қониқтирмайди. 

Буни амалга ошириш учун қўлимиздан келганича ҳаракат қиламиз, - деди Умиджон Эргашев.