Супертрансферлар қанчага тушди?

Англия Премьер-лигасининг амалдаги чемпиони “Ливерпуль” Европа клублари орасида ёзги трансферларга энг кўп маблағ сарфлаган жамоа бўлиб чиқди.

Transfermarkt портали экспертларининг қайд этишича, мерсисайдликлар янги ижрочилар учун жами 308,68 миллион евро миқдорида маблағ сарфлаган. Куни кеча, “Ливерпуль” 95 миллион евро эвазига “Айнтрахт” ҳужумчиси Уго Экитикени трансфер қилгани ҳақида расмий хабар тарқатди.

Манбага кўра, трансфер харажатлари бўйича иккинчи ўринда Англия Премьер-лигасининг яна бир қудратли клуби “Челси” қайд этилган. “Аристократлар” нишондаги трансферлар учун 243,77 миллион евро чиқим қилди.

Кучли учликни “Реал Мадрид” якунлаб берди. Испанлар Хаби Алонсонинг янги лойиҳаси учун ҳозирча 167,5 миллион евро йўналтириб, бир неча юқори даражадаги ўйинчиларни олиб келди.

Кейинги икки ўринда Манчестер шаҳрининг икки клуби қайд этилган. Рубен Аморим қўл остида янги таркиб шакллантираётган “Манчестер Юнайтед” 153,2 миллион еврога бир нечта футболчи олди. “Манчестер Сити” эса, авлодлар алмашинуви жараёнида яна 145,7 миллион евро харажат қилди.