Супертўпурар нега айнан “Арсенал”ни танлаганини айтди

Англия Премьер-лигаси ғолиблигига даъвогарлардан ҳисобланган “Арсенал” янги мавсум олдидан таркибини кучайтириш режасини амалга оширмоқда.

Ўтган чемпионатда Микелль Артета марказий ҳужумчи масаласида муаммога дуч келганди. Энди испаниялик мутахассис бу бош оғриғидан қутилди. Клуб Европадаги барча лигаларни ҳисобга олганда энг кўп гол урган форвард Виктор Дьёкерешни олиб келди.

27 ёшли швед тўпурарининг “Спортинг”дан трансфери 63,5 миллион еврога тушди. Дьёкереш трансфер бўйича ўз фикрини билдирди.

- Мен “Арсенал” тўғри танлов бўлишини чин дилдан ҳис қилдим. Ўтган йили Арсеналга қарши ўйнаганимда, бу жуда кучли жамоа эканини ва унга қарши ўйнаш қийин эканига амин бўлгандим.

Айнан мана шу омил “Арсенал”ни танлашимга сабаб бўлди. Бундан ташқари, клуб тарихи ва мухлисларининг ҳам роли бор. Жамоа ишқибозлари мени бу ерга ўтишимдан олдин қўллаб-қувватлай бошлашди. Энди уларни стадион трибуналарида кўришдан мамнун бўламан, - деди Виктор Дьёкереш.