Суперлигада мавсумдаги дастлабки истеъфо рўй бериши мумкин

Ўзбекистон Суперлигаси 3-тури доирасида "Локомотив"дан учралган йирик (0:4) мағлубиятдан сўнг "Андижон" бош мураббийи Элдор Сакаев истеъфо беришига шаъа қилди.

"Биринчи голни ўтказиб юборгач, концентрацияни йўқотиб қўйдик. Ғалабада футболчилар эътироф этилади, мағлубиятда эса мураббий. Ҳужумда муаммоларимиз бор. Орта қолган 3 баҳсда 1 гол киритдик ва у ҳам бўлса стандарт вазиятдан. Ўйлашимча, ҳужумчиларимизга совуққонлик ва бироз агрессивлик етишмаяпти.

Оғир мағлубиятни қабул қилиб олдик. Футболда майда нарсалар бўлмайди. Ўйиндан-ўйинга тайёр бўлиб борамиз. Биз бугун амалдаги чемпионларга қарши ўйнадик. Футболчиларга эътирозим йўқ, бугун мен мағлуб бўлдим.

Рўзимбой Аҳмедов 2-турда "Қўқон-1912"га қарши баҳсда жароҳат олиб майдонни тарк этган эди. Унинг сафга қайтиши учун 4-5 кун зарур.

"Қизилқум" билан ўйиндаги дуранг учун мукофот пуллари? Йўқ, биз ҳали мукофот пули олганимиз йўқ. Қарздорлик? Келинг яхшиси, бу ҳақда гамирмайлик. Бу клубнинг ички иши саналади ва матбуотга олиб чиқмоқчи эмасман.

Ҳар бир клубда муаммо бор, улар ўша клубни ичида ҳал этилиши керак. Бугун ўзим учун қарор қабул қилишим керак: ёки ишимни давом эттираман, ёки кетаман", - деди Сакаев.