"Шўртан"ни ким бошқаришини биласизми?

Бугун ЎзПФЛ “Шўртан” клуби бош мураббий бўлиб ишлаб келган Элдор Мойлиев билан амалдаги шартнома бекор қилинганлиги ҳақида расмий хабар тарқатди. 

Маълум бўлишича, Асрор Алиқулов кеча “Шўртан”да биринчи машғулотини ўтказган. Афтидан, у яна ғузорликлар бош мураббийига айланади. Бунгача Асрор Чориевич “Машъал”да ишлаётганди. Аввалига бош мураббий, кейин эса шу йилнинг ёзидан U21 жамоасини бошқаришга киришди.

Алиқулов футболчилик фаолиятини айнан “Шўртан” клубида якунлаган ва ушбу жамоада бир неча мавсум бош мураббийлик ҳам қилган. Ҳозирча “Шўртан” клуби бош мураббий масаласида расмий баёнот бергани йўқ. Лекин яқин вақт ичида бу содир бўлиши мумкин.

Эслатиб ўтамиз, бу йил Суперлигага қайтган “Шўртан” 23-турдан кейин турнир жадвалида 12 очко билан сўнгги - 16-ўринни эгаллаб турибди.

5 октябрь куни ғузорликлар ўз уйида “Сўғдиёна”ни қабул қилади ва бу Алиқуловнинг дебют учрашувига айланиши кутилмоқда.