Шомуродов тўпурарлар пойгасида тоза биринчи ўринга чиқди

Туркия чемпионатининг 12-турини “Генчлербиргили” ва “Истанбул Башакшеҳир” ўртасидаги учрашув бошлаб берди.

Кескин ва муросасиз курашлар остида ўтган учрашувда ҳисобни очиш мезбонлар вакили Талиссонга насиб қилди. Аммо иккинчи бўлим бошланиши билан Элдор Шомуродов чемпионатдаги навбадаги голини уриб, “Башакшеҳир”ни яна курашга қайтарди.

Аммон Нури Шахин шогирдларининг хурсандчилиги узоққа чўзилмади. “Истанбул Башакшеҳир” ҳимоячилари жарима майдончаси ичкарисида ўйин қоидасини бузди. Пенальтини Мбайе Ньянг аниқ бажарди.

Эътиборли жиҳати, “Башакшеҳир” енгилган бўлса-да, Элдор Шомуродов голли учрашувлар сериясини учтага етказиб олди. Бу галги аниқ зарба легионеримизни тўпурарлар пойгасида биринчи ўринга олиб чиқди.

Айни пайтда 30 ёшли ўзбек футболчиси Суперлигадаги голлари сонини саккизтага етказиб, мавсум бошидан биринчи ўринда келган “Трабзонспор” вакили Пол Онуачудан ўзиб кетди.

Таъкидлаш лозимки, Туркия Суперлигасининг тўпурарлари ўртасида “Олтин бутса” учун курашда асосан Европанинг нуфузли клубларидан турк лигасига таклиф этилган номдор футболчилар иштирок этмоқда.

Туркияга “Рома”дан келган Шомуродов чемпионатдаги 12-учрашувида саккизинчи тўпини киритган бўлса, “Трабзонспор”га “Саутгемптон”дан келган Пол Онуачу ҳисобида еттита гол бор. Нигериялик ҳужумчи охирги голини қарийб бир ой олдин киритганини ҳам айтиш лозим.

“Олтин бутса” рейтингининг кейинги поғоналарида жойлашган аксарият ўйинчилар ҳам Европанинг кучли лигаларида тажриба тўплаган чарм тўп усталаридир. Хусусан, олтитадан гол урган юлдузлардан аргентиналик Мауро Икарди илгари “Сампдория”, “Интер” ва “Пари Сен-Жермен”да, марокашлик Юссуф Эн-Несири Испания чемпионатининг “Леганес”, “Малага” ва “Севилья” каби жамоаларида ўйнаган. Улар қаторига маҳаллий тўпурар – “Коньяспор” форварди Умут Найир ҳам қўшилди. Фаолиятининг катта қисмини Туркия клубларда ўтказаётган 32 ёшли ҳужумчи орада бир йил Хорватия чемпионатига бориб, “Хайдук” клуби шарафини ҳимоя қилиб келганини инобатга олмаса, асосан турк лигасига тўлиқ мослашганлиги учун бошқа тўпурарлардан ажратиб турибди.

Айни пайтда чемпионат тўпурарлари баҳсининг учинчи гуруҳида бештадан тўп киритган тўрт футболчи жой олган. Хусусан, “Самсунспор”дан Карло Холсе, “Трабзонспор”дан Фелипе Аугусто, “Бешиктош”дан Рафа Силва ҳамда “Фенербаҳче”дан Талискани ҳам “Олтин бутса” учун асосий даъвогарлар рўйхатига қўшиш мумкин.

Эслатиб ўтамиз, мавсум бошида “Рома”дан “Истанбул Башакшеҳир”га ижара шартномаси асосида кўчиб ўтган Элдор Шомуродов Суперлига доирасида “Бешиктош”, “Аланьяспор”, “Коньяспор”, “Галатасарой”, “Кожаэлиспор” ва “Генчлербирлиги” дарвозаларига биттадан гол урган бўлса, “Антальяспор” майдонида ўтказилган баҳсдан дубль билан қайтган.

“Истанбул Башакшеҳир” Туркия Суперлигасининг навбатдаги турида “Трабзонспор”ни қабул қилади. 23 ноябрда бўладиган бу баҳсда тўпурарлар пойгасининг икки етакчиси – Элдор Шомуродов ва Пол Онуачу ўзаро тўқнаш келади.

ФИФА янги ўзбек юлдузи ҳақида маълумот чиқарди

Ўзбек футболчиси жаҳон чемпионати “Олтин бутса”сига даъвогар!

Ўзбекистоннинг жаҳон чемпионатидаги ғалабасига қандай муносабат бўлди?Шомуродов “тахти”да қолди!Ҳусановнинг ўйини қандай баҳоланди?

Яна қанча гол керак? Шомуродов энди ҳақиқий тўпурарлигини исботлаяпти...