Shesni "Barselona" safida tibbiy ko‘rikdan o‘tdi

34 yoshli polshalik darvozabon Voytsex Shesni Ispaniyaning “Barselona” klubi safida tibbiy ko‘rikdan o‘tdi, deya xabar bermoqda jurnalist Fabritsio Romano o‘zining ijtimoiy tarmoqdagi sahifasida.

Manba bergan xabarga ko‘ra, Shesni “ko‘k-anorranglilar” bilan joriy mavsum oxirigacha amal qiladigan shartnoma borasida kelishib olgan. Shuningdek, u bugun 1 oktyabr kuni bo‘lib o‘tadigan “Barselona”ning “Yang Boyz”ga qarshi Chempionlar ligasi 2-tur uchrashuvini tribunadan kuzatib borishi ma’lum bo‘ldi.

Eslatib o‘tamiz, o‘tgan yozda polshalik darvozabon faoliyatini yakunlaganini e’lon qilgan edi, ammo "Barselona" qiziqishlari fonida futbolga qaytishga qaror qildi. O‘tgan mavsumda Shesni 34 ta o‘yinda maydonga tushib, 30 ta gol o‘tkazib yuborgan. Voytsex Shesni faoliyati davomida “Arsenal”, “Roma” va “Yuventus” kabi grand jamoalarda o‘ynagan.