Роналду нега Жота ва уни укасининг дафн маросимида иштирок этмаганини айтди

Криштиану Роналду Португалия терма жамоасидаги шериги Диогу Жотанинг дафн маросимида нега иштирок этмаганига изоҳ берди.

3 июль куни Испанияда "Ливерпуль" форварди Жота ва унинг Португалия иккинчи лигаси вакили "Пенафиэл" сафида тўп сурган укаси Андре Тейшейра да Силва ЙТҲда ҳалок бўлди.

" Икки дақиқа. Одамлар мени кўп танқид қилишади, айтганимдек, бу мени қизиқтирмайди. Ўзингизга ишонганингизда, бошқаларнинг гаплари сизни безовта қилмайди.

Мен қилмайдиган ишлардан бири... Отам вафотидан кейин қабристонларга бошқа бормадим.

Бундан ташқари, қаерга борсам цирк бошланади. Яна шунинг учун ҳам бормадимки, агар у ерда пайдо бўлганимда, эътибор менга қаратилган бўларди. Менга эса бундай эътиборнинг кераги йўқ.

Мен танқид қилмайман, шунчаки кўрганимни ва менга ёқмаганини айтаман... Шундай нозик нуқталарда интервью бериш, у ҳақда, футбол ҳақида гапириш? Қўйинглар, болалар, нималар деяпсизлар. Мен бу шоунинг бир қисми бўлишни истамайман. Хоҳласангиз - омад.

Одамлар мени танқид қилишлари мумкин, лекин мен ўз қароримдан мамнунман. Одамлар мени кўриши ва мақташи учун биринчи қаторда бўлишим шарт эмас: Криштиану келди. Йўқ, йўқ. Мен баъзи нарсаларни режалаштиряпман, унинг оиласини ўйлайман. Одамлар нима қилаётганимни кўриши учун камералар қаршисида бўлишим шарт эмас. Мен ҳаммасини кадр ортида бажараман, дўстларим", - деди "Ан-Наср" ва Португалия терма жамоаси форварди Пирс Морганга берган интервьюсида.