Sarri: Ronalduning o‘z shaxsiy manfaatlari bor

“Latsio” bosh murabbiyi Mauritsio Sarri “Yuventus”da Krishtianu Ronaldu bilan ishlagan paytlarini yodga oldi.

“Bu futbolchini boshqarish oson emas. Ronalduning jamoadan tashqari o‘z shaxsiy manfaatlari bor. Biroq, u haqda statistika gapiradi, buni har bir mavsum oxirida ko‘rish mumkin”, - dedi italiyalik mutaxassis.

36 yoshli Ronaldu o‘tgan mavsum A Seriyada jami 33 ta o‘yinda maydonga tushdi. U ushbu uchrashuvlarda o‘z hisobiga 29 ta gol hamda 3 ta golli uzatma yozdirib qo‘ydi.

Krishtianuning “keksa sinora” bilan amaldagi shartnomasi 2022 yilga qadar imzolangan. U “Yuventus” safida 2018 yildan buyon to‘p surib kelmoqda.