Самвел Бабаян: Эртага яхши натижа қайд этиш учун қандай ўйнаш кераклигини биламиз

Ассалому алайкум. Хайрли кун. ОЧЛга қайтиш жуда ёқимли. Бундай мусобақада Ўзбекистон шарафини ҳимоя қилиш катта масъулият ва шараф! Биз Ўзбекистоннинг энг футболни севувчи региони – Наманган шарафини ҳимоя қиламиз. Улкан мухлислар армиясига эга бу жамоа. Бу “Навбаҳор”нинг ОЧЛдаги илк иштироки. Умид қиламанки, “Навбаҳор” бу мусобақада доимий равишда иштирок этиб боради.

Хабарингиз бор эртага ОЧЛ саралаш босқичининг ҳал қилувчи баҳси доирасида “Ал Вакра” ва “Навбаҳор” ўртасида баҳс бўлиб ўтади. Ўйиндан аввал, “лочинлар” устози матбуот анжуманида иштирок этди.

"Эртанги ўйин учун қўйилган вазифа ўзимиз истаган натижани қайд этиш ва ишқибозларимизни хурсанд қилиш. Бизни эртага мавсум олдидан яхши селекция ишларини олиб борган савияли жамоа билан куч синашамиз. Рақибимиз бу мавсум учун жиддий тайёргарлик кўрганини Қатар чемпионатидаги биринчи тур ўйинидаги 3:0 ҳисоб кўрсатиб берди. Албатта, стадионни ҳам алоҳида эътироф этиш лозим. Бу 22 йилда бўлиб ўтган ЖЧнинг безагига айланган арена. Менимча, ҳар бир мураббий ва футболчи учун бундай стадионда тўп суриш катта шараф.

Менимча, эртага жуда қизиқ баҳс бизни кутиб турибди. Биз рақибимизни Испаниядаги йиғинларини кузатдик. Таркибга яхши савиядаги футболчилар келиб қўшилган. Жамоани тажрибали мутахассис бошқармоқда. Деярли кучсиз томони йўқ жамоа. Ҳар бир чизиқда савияли футболчилар жамланган.

Албатта, рақибни кучли томонлари кўрдик, аммо ўйин борасидаги айрим нарсаларни ҳам кўрганимиз рост. Бу ҳозирча сир бўла қолсин. Биз эртага яхши натижа қайд этиш учун қандай ўйнаш кераклигини биламиз."