"Рома" ҳужумчиси Россия клубининг таклифини ўйлаб ўтирмай рад этди

"Рома" ҳужумчиси Тэмми Абрахам Санкт-Петербургнинг "Зенит" клубига ўтишдан бош тортди. Бу ҳақда инсайдер Николо Скира хабар берди.

Аввалроқ, "Зенит" Абрахам учун 20 миллион евро таклиф қилгани, футболчига эса 3 йиллик шартнома доирасида йилига 5 миллион евро маош таклиф этилгани маълум бўлган эди. Аммо англиялик футболчи ушбу таклифни рад этди. У фаолиятини Европа топ-5 чемпионатларидан бирида давом эттирмоқчи.

27 ёшли Форвард ўтган мавсумни "Милан"да ижара асосида ўтказиб, А Серияда 28 ўйинда 3 гол урди.

Римликлар Тэммидан ташқари, ҳамюртимиз ва миллий терма жамоамиз сардори ҳисобланган Элдор Шомуродовни ҳамда Артём Довбикни қўйиб юбориш ҳақида жиддий ўйламоқда.