"Реал ТВ" ҳакамларни танқид қилди: "Нима учун Родригога пенальти берилмади?"

Мадриднинг "Реал" клуби 8-тур доирасида "Вильярреал"ни 3:1 ҳисобида мағлуб этди. Беллашувнинг сўнгги дақиқаларида "Реал" вингери Родриго рақиб ҳимоячиси Рафа Марин билан бўлган курашдан сўнг жарима майдонида йиқилган, аммо ҳакам Гильермо Куадра Фернандес бу вазиятда қоидабузарлик кўрмаган.

Клубнинг расмий телеканалида ушбу қарор қаттиқ танқид қилинди.

"Родриго пенальти белгилашни сўраяпти, аммо уни рад этишяпти, чунки улар аллақачон битта пенальти белгилашган. Иккита пенальтини қандай белгилашлари мумкин? Улар ростдан ҳам такрорни кўрмасликка қарор қилишдими? Агар бу ҳақиқатдан ҳам пенальти бўлса, керак бўлса еттита пенальти белгилаш керак. Баъзан мен ҳеч нарсани тушунмайман. Айнан Рафа Марин алоқани бошлаган, менимча, бундан аниқроқ нарса йўқ.

Бу пенальти белгилангандан кўра ҳам аниқроқ. Родриго билан бўлган ҳолат жуда ғазабли эди. Нима учун пенальти белгиланмагани тушунарсиз. Кадрда контакт яққол кўринади. Агар мен ҳакамликни ўрганганимда, менга бу пенальти эканлигини айтишган бўларди. Бугунги кунда Мадрид фойдасига учта пенальти белгилаш мумкин эмас." — деди клуб телеканали бошловчиси.