"Реал" Ла Лигада бу натижага эришган илк жамоа

Мадриднинг "Реал" клуби Ла Лигада 5000 очко тўплаш маррасига эришди.  

Карло Анчелотти жамоаси "Валенсия"га қарши ўйинда камбек амалга оширишди. "Қаймоқранглилар" 85-дақиқагача ҳисобда ортда боришди, 78-дақиқада эса Винисиус Жуниорнинг майдондан четлатилиши сабаб, бир киши кам бўлиб қолишди. Ғалабани Лука Модрич ва Жуд Беллингемнинг аниқ зарбалари билан қўлга киритишди.  

Жума кунги ғалаба "Реал"га Испания чемпионатида 5000 очко тўплаб, тарихий натижа қайт этишди. Эндиликда, Мадрид грандининг ҳисобида 5002 очко бор. Бу энг яхши натижа. Иккинчи ўринда бораётган "Барселона" умумий ҳисобда 4887 очкога эга.