“Реал” иккита супертрансферни ҳал қилди

“Реал” клуби спорт бўлимидаги мутасаддилар жамоа таркибини мунтазам кучайтириб бориш мақсадида Хаби Алонсо қўллаётган ўйин услубига мос ўйинчиларни топишга ҳаракат қилмоқда.

Transfer News Live ва Defensa Central каби нашрларнинг ёзишича, мадридликлар клуб трансферлари рўйхатида турган иккита масалани ҳал қилди. Манбаларга кўра, улар “Ливерпуль” билан шартномаси якунланаётган Иброҳим Конатени ёзда эркин агент мақомида Мадридга келишга кўндирди.

Шу боис, 26 ёшли франциялик ҳимоячи Англия чемпиони билан якунланиб бораётган амалдаги шартномани узайтиргани йўқ.

Бундан ташқари, “Реал” клуб тарбияланувчиси бўлган Николас Пасни “Комо”дан ортга қайтармоқчи. Италия чемпионатида ўйини очилиб кетган аргентиналик ёш футболчи бир неча гранд клублар нишонида турибди.

“Қироллик клуби”да нархи кескин ошиб кетган Николас Пасни атиги 10 миллион евро эвазига қайта сотиб олиш ҳуқуқи бор.

Кутилмаган ўзгаришлар рўй бермаса, ҳар икки футболчи 2026 йилнинг ёзидан бошлаб, тақдирини “Реал” билан боғлашга розилик берган.