Қадрланмаётган юлдуз? Родриго "Реал"ни тарк этиши мумкин

Карло Анчелоттининг "Реал"дан кетиши аниқ бўлди. Шу билан бирга, Лукас Васкес ҳам жамоани тарк этмоқда. Тушунарли кетиш вақти келиб қолган мураббий ва футболчи. Аммо катта номлардан бири ҳам Мадрид  клуби билан хайрлашиши мумкин. Гап Родриго ҳақида кетмоқда. 

2019 йили "Сантос"дан "Реал"га келиб қўшилган вингер кейинги йиллар давомида жамоанинг асосий футболчисига айланиб олди. Аслида чап қанот вингери ҳисобланган бразилиялик ўнг қанотга ўтказилди ва бу муваффақиятли бўлди. Муҳим ўйинларда ҳам катта саҳнага чиқишдан қўрқмайдиган, мухлислар мақтаниб юрадиган камбэкларда муҳим голларни урган Родриго учун мавсум унчалик ҳам омадсиз ўтгани йўқ: 13 та гол урди ва 10 та ассист амалга оширди. 

Родригонинг сўнгги "Эл-класико"да майдонга тушмагани кўпчилик учун кутилмаган ҳолат бўлди. Унинг кичик жароҳати борлиги айтилди, лекин "Marca"нинг маълум қилишича, футболчининг ўзи учрашувдан олдин ўйнашга тайёр эмаслигини айтган. Вингер учун сўнгги ойлар қийин ўтди. Родриго ўзини клубда етарлича қадрланмаётгандек ҳис қилмоқда, яъни ўзини Килиан Мбаппе, Винисиус Жуниор ва Жуд Беллингемларнинг соясида қолиб кетмоқда, деб ҳисоблайди. 

Эътибор берсангиз, Родриго голларини мана шундай нишонлайди.

Бу Жон Сенанинг альбомларидан бирининг номига бориб тақалади: "You can't see me".  "Сен менинг тенгим эмассан, ёки мен шунчалик зўрманки, сен буни кўра олмайсан", деб талқин қилинади. Ушбу гол нишонлаш билан Родриго ҳам шундай демоқчи.

Родригонинг келажаги ҳали ҳам очиқ. У кетиш ёки қолиши бўйича тез орада бир қарорга келиши кутилмоқда.