O‘zbekiston MTJ murabbiylar shtabida avstraliyalik mutaxassis ham bo‘ladi

Hozirgina O‘zbekiston milliy terma jamoasiga yangi bosh murabbiy tayinlandi. Unga ko‘ra Ektor Kuperning bo‘shab qolgan o‘rnini hali sovub ulgurmasidan "Bunyodkor" ustozi Vadim Abramov egalladi.

O‘FA matbuot xizmati terma jamoa murabbiylar shtabidan kimlar o‘rin olishini ma’lum qildi. Vadim Abramovga murabbiylar shtabida O‘zbekiston milliy terma jamoasi safida uzoq yillar muvaffaqiyatli o‘yin ko‘rsatgan va endilikda murabbiylik sohasida ham qisqa vaqt ichida tez o‘sishga erishib, muxlislar ishonchini qozonishga ulgurgan Timur Kapadze yordam beradi. Shuningdek, o‘zbek futboli muxlislariga yaxshi tanish bo‘lgan avstraliyalik tajribali mutaxassis Mirko Yelichich futbolchilarning jismoniy tayyorgarligi bilan shug‘ullanadi. Darvozabonlar bilan esa Denis Ivankov ishlashda davom etadi.