Неймар келажагига ойдинлик киритди

ПСЖ ҳужумчиси Неймар ёзда Франция клубини тарк этишни истамаслигини айтди.

“Мен ПСЖда қолмоқчиман. Клубда ҳеч ким менга келажагим билан боғлиқ гаплар айтмади. Раҳбарият нима истаётганини билмайман, лекин мен Парижда қолишни истайман”, — деди Неймар “AFP” нашрига берган интервьюсида.

Неймар ПСЖга 2017 йилнинг августида “Барселона”дан 222 миллион евро эвазига кўчиб ўтган эди. 30 ёшли бразилиялик ўтган мавсум Париж клуби сафида 26 ўйин ўтказиб, ўз ҳисобига 13 гол ва 8 голли узатма муаллифига айланган.

Аввалроқ футболчи ёзги трансфер ойнасида жамоасини ўзгартириши мумкинлиги ҳақида хабарлар тарқалган эди. “Transfermarkt” портали Неймарнинг нархини 75 миллион еврога баҳоламоқда. Унинг ПСЖ билан шартномаси 2025 йилнинг июнь ойи охиригача амал қилади.