МЮ "бомба" трансферни қачон эълон қилади?

"Манчестер Юнайтед" бугун, 9 август куни бўлиб ўтадиган "Фиорентина"га қарши ўртоқлик ўйини олдидан ҳужумчи Бинямин Шешкони мухлисларига таништиради. Бу ҳақда Британиянинг Mirror нашри хабар бермоқда.

Манбага кўра, Словения терма жамоаси форварди аллақачон "қизил иблислар" сафида тиббий кўрикдан ўтмоқда. Таъкидланишича, инглиз гранди 22 ёшли футболчининг трансфери учун "РБ Лейпциг"га 74 млн фунт (85,8 млн евро) тўлайди.

Ўтган мавсумда Шешко барча мусобақаларда 45 та ўйинда майдонга тушиб, 21 та гол ва 6 та голли узатмани амалга оширди. Футболчининг клуб билан амалдаги меҳнат шартномаси 2029 йилнинг ёзига қадар мўлжалланган. Transfermarkt порталида келтирилган маълумотларга кўра, футболчининг бозор нархи 70 млн еврони ташкил этади.