"Мураббийнинг қўнғироғидан кейин хафсалам пир бўлди" ёхуд Оливер Шаркич ҳайратда!"

Яқинда Sports.uz сайти орқали “Пахтакор” легионер ҳужумчиси Оливер Шаркич билан хайрлашаётгани тўғрисида биринчи бўлиб маълумот бергандик.

Тез орада клуб буни тасдиқлаган ҳолда Шаркични рўйхатдан чиқарганини маълум қилди. Футболчи жамоадан кетиши бўйича сайтимиз мухбирига интервью берди.

- “Пахтакор” билан шартномангиз бекор қилинганидан хабарим бор. Ўзи нима бўлди?

- Ҳа, бу тўғри. Мен билан нима содир бўлди? “Насаф”га қарши назорат ўйинидан кейин бир кунга дам олиш берилганди. Ўша куни ҳордиқ чиқараётгандим. Шунда мураббий қўнғироқ қилди. У иккинчи давра учун мени ҳисобга қўшмаётганини айтди. Мени жамоада кўрмаяпти. Шунинг учун хайрлашмоқчилигини айтди. Рости, бу ҳолат мен учун бироз ҳайратланарли эди. Чунки “Насаф” билан назорат учрашувида иккита гол ургандим ва учинчи голга ассистни ҳам амалга оширгандим. Эътиборлиси, тўпиғимдан олган жароҳатимдан кейин биринчи маротаба майдонга тушгандим. Бундай хабардан ҳайратландим ва тўғрисини айтсам хафсалам пир бўлди.

- Жамоага илк бор келганингиздаги ҳолат қандай эди ва ҳозир қанақа?

- Клубга биринчи маротаба келганимда ўзимни Осиё футболи, хусусан Ўзбекистонда кўрсата олишимдан хурсанд бўлгандим. “Пахтакор” оиласига жуда яхши қабул қилиндим. Биз ҳар куни қаттиқ ишлаётгандик ва ривожланиш учун ҳаракат қилаётгандик. Бу йўлда ўзимиздаги бор кучни сарфлаётгандик. Қачонки, Войнески мени “страйкер” вазифасида ўйнатишни бошлаганида, мен гол ура  бошлагандим. Эътибор берган бўлсангиз, жароҳатимгача охирги учта учрашувда 3 та тўп киритишга муваффақ бўлдим. Бундан олдинги самарадорлигим ҳам у қадар ёмон эмасди. 10-рақам позициясида ўйнаётгандим. “Навбаҳор”га қарши ўйинда яхши ўйин кўрсатиб, дўстим Драган Черанга 3 очколик ғалаба голи учун яхши пасни узатгандим. Тўғриси, 6 ҳафталик танаффусдан сўнг, “Насаф”га қарши учрашувда энг яхши футболчи бўлдим. Мана шундай яхши ҳаракатларимдан кейин ҳам мени ортиқ “Пахтакор” шарафини ҳимоя қила олмаслигим ранжитади. Энди Европага қайтишга мажбурман. Шуни айтишим мумкинки, “Пахтакор” либосини кияр эканман, доим 100 фоиз куч билан ҳаракат қилганман. Иккинчи даврада ҳам қолиб, ўзимни энг яхши тарафларимни кўрсатишни истардим. Лекин биз барибир мураббийнинг қарорини ҳурмат қилишимиз керак.

- Максим Шацких сизга ишонмади, деб ўйлайсизми?

- Билмайман, нима учун у менга ишонмади?! Доим унинг кўрсатмаларини тинглаётгандим ва амал қилишга ҳаракат қилаётгандим. Чунки ушбу мураббий футболчилик фаолиятида кучли ҳужумчи бўлган. Ундан кўп нарсаларни ўрганишни истагандим. Ростдан ҳам мен билан шартномани бекор қилмоқчилигини ва иккинчи даврада менга ишонмаслигини билдирганида ҳайратландим. Ўйлайманки, ўзбек футболига бера олишим мумкин бўлган нарсалар ҳали кўп эди.

- Адашмасам, сизни “Пахтакор”га Славче Войнески таклиф қилган. У кетганидан кейин мен ҳам кетишим керак, деб ўйлаганмидингиз?

- Ҳа, мени бу ерга Славче Войнески олиб келганди. Ундан миннатдорман. Чунки Славче сабабли Ўзбекистон чемпионатида ва Осиё Чемпионлар лигасида тўп суриш имкониятига эга бўлдим. Бу жуда эсда қоларли бўлди. Лекин менга Войнескининг кетиши ҳақида ҳеч ким гапирмаганди. Бу воқеа менинг тикланиш жараёнимда содир бўлди. Қайтганимдан кейин ҳам ҳеч нарса содир бўлмаганидек, ўз ишимни бажаришда давом этаётгандим. Мавсумнинг қолган қисмида ҳам “Насаф”га қарши кўрсатганимдек ажойиб ўйинлар намойиш этишни мақсад қилгандим. Мен Ўзбекистонда қолиб кўпроқ голлар уришни ва “Пахтакор” билан мамлакат чемпиони бўлишни хоҳлагандим.

- Аввалида “Пахтакор”ни қандай тасаввур қилгандингиз? Барчаси сиз ўйлагандекмиди?

- Мен доим айтиб келганман: бу жуда ҳам яхши клуб. Айниқса, бундай фикрларни кўп йиллик тажрибам орқали гапиряпман. Кўплаб жамоаларда ўйнаганман. Бу ерда яхши футболчилар, яхши ташкилотчилик, одамлар клубга шошиб келишади. Жамоадошларим ва клуб ходимлари билан ҳеч қандай муаммо бўлмаган. Биз барчамиз худдики бир оиладек эдик.

- Ўзбекистон Суперлигаси даражаси қандай? Сизга ёқдими?

- Ўзбекистон чемпионатидан жуда ҳам роҳат олдим. Бу ҳужумкор ва тезкор чемпионат экан. Кўплаб иқтидорли футболчиларни кўрдим. Айниқса, ушбу йилда чемпионликка даъвогар жамоалар сони ортиб кетди. Олдин айтиб ўтганимдек, бу ерда қолиб, қизғин курашда қатнашмоқчи эдим. Аммо, афсуски, мураббий шундай қарорга келди.

- Энди кейинги режангиз қандай? Янги таклифлар борми?

- Менинг ҳозирги режам ўз спорт формамни сақлаб қолиш ва доимий шуғулланиш. Бошқа клуб излаш ва футбол ўйнашни давом эттиришим керак. Бу Европада бўладими, Осиёдами, фарқи йўқ. Буни олдиндан билиш имконсиз. Аммо ҳозирча эркин агентман.

- Биринчи даврада 3 та гол урдингиз. Жамоага мослашиш қийин кечмаганмиди? Ёки бирор нима сизни қониқтирмадими?

- Биринчи даврада мен ўйнаган дақиқалар ва урган голлар ёки статистикамга қарайдиган бўлсангиз, аслида ҳаммаси яхши ҳолатда. “Страйкер” позициясида ўйнаб, 3 та ўйинда 3 гол уришга муваффақ бўлдим. Бу менимча жамоадаги энг яхши ҳолатим эди. Клубга шу позицияда кўпроқ ёрдам бера олардим. Юқорида айтганимдек, жамоадошларим билан яхши алоқаларимиз бор эди. Мураббий доим қарорларни якуний тарзда қабул қилади.

- Умуман айтанда, “Пахтакор”да хурсандмидингиз?

- Жуда ҳам хурсанд эдим. Агар сиз машғулотлардан олинган фотосуратларни барчасини кўрадиган бўлсангиз, уларнинг ҳаммасида мен табассум қилган ҳолатда кўринаман. Чунки ростдан ҳам бу ерда яхши дўстларим ва жамоадошларим бор эди. Улар билан бирга ишлаётганимдан хурсанд эдим. Умид қиламанки, улар билан келгусида ҳам яхши алоқаларни сақлаб қоламиз.