"Футболчилар ўз кучига ишонмаяпти, ҳамма айбни ўз бўйнимга оламан" - "Машъал" устози аламли мағлубият ҳақида

Суперлиганинг 17-турида “Машъал” Ғузорда “Динамо”ни қабул қилди.  Дастлабки 5 дақиқада иккита гол урган муборакликлар якунда 2:4 ҳисобида мағлубиятга учради. Учрашувдан сўнг “Машъал” бош мураббийи Отабек Нарзуллаев матбуот анжуманида иштирок этди.

- Ҳисоб 2:0 эди, ҳимоядаги хатоларимиз бизга қимматга тушди. Индивидуал хатолар эвазига биринчи бўлимда ҳисобни сақлаб қола олмадик. Иккинчи таймда йигитларда руҳий тушкунлик сезилди, биз буни устида ишлашимиз керак. Футболчилар ўзини ва жамоани кучига ишонмаяпти. Ишонч қўшиш керак, жамоани потенциали яхши. Яна ғалабалар келади, деган умиддаман.

- Жамоада янги қон кўриняпти. Лекин руҳий жиҳатни айтиб ўтяпсиз. “Динамо” бундай стартни кутмаганди. Жамоани асосий хатоси қаерда бўлди?

- 2:0 дан кейин ушбу натижани ушлаб қолиш! Ўйлайманки, 2:0 – бу натижа эмас. Яна ҳужумларни кўпайтиришимиз керак. Футболчиларимиз ҳисобни ушлаш учун ҳимояга “ётишди”. “Пахтакор” билан ўйинда кўрган бўлсангиз ҳимояга ўтирганимиз мағлубиятга олиб келди. Футболда 90 дақиқа ҳимояланиб ютиб бўлмайди. Бунинг учун мувозанат, йигитларга жисмоний куч яхши бўлиши керак. Жароҳатдаги ўйинчилар энди қўшилишяпти. Шу боис уларни мажбуран қўйяпмиз. Хоҳлаймизми-йўқми, уларни жисмоний тайёргарлиги аъло даражада эмас. Шу сабабли иккинчи таймда қийналдик.

- Облақуловни ўзингиз кашф қилгансиз. Бугун “Машъал”ни жазолади...

- Бу – футбол. Хурсанд қилаётгани у “Машъал”дан чиққан. Ким қаерда бўлишидан қатъий назар футболчи ҳам, мураббий ҳам ўз ишини қилади. Футболчини иши майдонга чиқиб жон-жаҳди билан ўйнаш, ўзини кўрсатиш. Беҳруз Облақулов учун хурсандман. Бу – футбол, бир кун ютасиз, бир кун ютқазасиз. Мағлубиятдан хулоса чиқарамиз, қаерда хато қилаётганимизни таҳлил қиламиз. Футболчиларни яна руҳан тайёрлаймиз. Аввало, мағлубиятга мураббий айбдор. Ҳамма айбни ўз бўйнимга оламан. Мағлубиятлар мураббийни кўпроқ ишлашга ундайди. Кейинги ўйинда руҳан янада яхшироқ тайёрлаб, бундан ҳам кучли бўлиб қайтишимиз керак. Жамоамиз яхши шаклланган. Футболчиларга озгина ўзига бўлган ишонч етишмаяпти. Ишонишса кўп нарсаларга қодир. Иккинчи таймда ҳам кўп вазиятлардан чиқиб кетдик, имкониятлар бор, охирига етмаяпмиз. Бу руҳий ҳолатга боғлиқ.

- Ҳумоюн Муртазоев қачон қайтади?

- Кейинги учрашувларга қайтиши керак. Лекин у машғулотга қўшилмаяпти. Шифокорларимиз ҳали рухсат беришмаяпти. Оёғида бироз жароҳати бор. Бу ҳам бизга таъсир қиляпти, катта йўқотиш. Асосий ҳужумчимиз ва тўпураримиз. Кейинги учрашувларда Хумоюндан ташқари ҳамма қўшилади. Кейинги турда бизни “Сўғдиёна” билан яхши ўйин кутяпти. Мухлислардан узр сўраймиз. Яна ишлашда давом этамиз, қўлимизни туширмаймиз, охиригача курашамиз.