Муҳим янгилик: Гвардиола Ҳусановни қачон майдонга туширишини айтди!
“Манчестер Сити” бош мураббийи Хосеп Гвардиола 29 октябрь куни Англия лигаси кубоги - Carabao Cup мусобақасининг тўртинчи раундида “Суонси Сити”га қарши ўтказиладиган учрашувдан олдин жамоаси ҳақида сўнгги маълумотларни бериб ўтди.
Бундан аввал, “Манчестер Сити”нинг барча турнирларда давом этган тўққиз ўйиндан иборат мағлубиятсиз серияси “Астон Вилла” томонидан тўхтатилганини айтиб ўтиш лозим. Якшанба кунги ўша учрашувда “Астон Вилла” ҳимоячиси Матти Кэшнинг 19-дақиқадаги узоқ масофадан йўллаган зарбаси “Вилла Парк” эгаларига ғалаба келтирди. Бу ўйинда “Астон Вилла” жуда қатъиятли, “Манчестер Сити” эса суст ҳаракат қилди.
Гвардиола ва унинг штабида мағлубият устида кўп ўйлаб ўтиришга вақт йўқ, “шаҳарликлар” энди Уэльсда “Суонси Сити” билан бўладиган тўқнашувда муваффақиятли қатнашиши керак. Шундан сўнг, жамоани Премьер-лига доирасида “Борнмут” ва “Ливерпуль”га, Европа Чемпионлар лигаси умумий гуруҳ тўртинчи турида “Боруссия Дортмунд”га қарши муҳим баҳслар кутиб туради.
“Суонси” билан бўладиган учрашув “Манчестер Сити” вакиллари учун олдиндаги катта ўйинларга тайёргарлик вазифасини ҳам ўтаб беради.
Хосеп Гвардиола кейинги икки ҳафта давомидаги ўйинлар олдидан клуб тиббиёт бўлимидан иккита катта хушхабар олди. Бир ой муқаддам “Арсенал” билан бўлган ўйинда шикастланган Абдуқодир Ҳусанов сафга қайтди ва машғулотларни бошлаб юборди.
Клуб шифокорлари “Олтин тўп” соҳиби Родрига ҳам “Суонси Сити” билан бўладиган учрашувга худди Ҳусанов билан бўлгани каби жамоавий машғулотларда қатнашишига рухсат берди.
“Манчестер Сити” ўтган йилдан фарқли ўлароқ, ҳозир жанговар таркибга эга, Ҳусанов ва Родрининг сафга қайтиши билан жамоа қудрати янада ортди. Гвардиола шогирдлари жорий мавсумда ўзлари иштирок этаётган барча мусобақалар, хусусан, Ангия лигаси кубогида ҳам бош соврин учун курашади.
Шу маънода, манчестерликлар учун Уэльсда “Суонси Сити” билан бўладиган тўқнашувнинг аҳамияти ҳам юқори. Хосеп Гвардиола бу баҳс олдидан лазаретдан чиқиб, машғулотларга қайтган шогирдлари ҳақида охирги маълумотлар билан ўртоқлашди.
Гвардиола биринчи бўлиб, Абдуқодир Ҳусанов “Суонси Сити” билан бир неча дақиқа ўйнаши мумкинлигини мамнуният билан таъкидлади.
- Ҳусанов чоршанба куни бўладиган учрашувда бир неча дақиқа ўйнашга тайёр, - деди испаниялик мураббий ўзбекистонлик легионер ҳақида фикр билдириб.
Гвардиола “Астон Вилла” билан ўйиннинг иккинчи ярмида ўзини ёмон ҳис қилган Эрлинг Холанд ҳақидаги саволга қуйидагича жавоб берди.
- Эрлинг рақибдан зарба еган. Унинг ҳолати кундан кунга яхшиланяпти. Охирги машғулотларда унинг ўзини қандай ҳис қилишига қараб, якуний хулосага келамиз, - деди бош мураббий.
Испаниялик мутахассис ҳамюрти Родри ҳақида ҳам гапирди.
- Родри ўйинга тайёр эмас. Ҳалоти яхшиоаняпти, биз билан машғулотларда қисман қатнашди. Лекин икки марта мушагини шикастлаганини инобатга олиб, тикланиш жараёнида уни эҳтиёткорлик билан кузатиб боригимизга тўғри келади, - деди Хосеп Гвардиола.
“Суонси” ва “Манчестер Сити” ўртасидаги баҳс 29 октябрдан 30 октябрга ўтар кечаси, Тошкент вақти билан соат 00:45 да бошланади.
Фикрлар