"Милан" франциялик ярим ҳимоячи билан келишувга эришди

"Милан" ярим ҳимоячи Адриен Рабьо трансфери бўйича "Марсель" билан келишувга эришди, деб хабар берди инсайдер Фабрицио Романо.

Маълумотларга кўра, италияликлар француз футболчисини 10 миллион евро эвазига сотиб олади. Рабьо "Милан" билан 4 йиллик шартнома имзолайди. Унинг тиббий кўриги душанба кунига белгиланган.

"Марсель" хавбекни Лига 1нинг "Ренн"га қарши учрашувидан (0:1) кейин содир бўлган жанжал сабаб трансферга қўйган эди.

Ўтган мавсумда Рабьо Лига 1да 29 та ўйинда майдонга тушиб, 9 та гол ва 4 та голли узатма қайд этган.