Мессининг қарори аргентиналикларни жумбушга келтирди

Саккиз карра “Олтин тўп” соҳиби Лионель Месси келажаги борасидаги барча масалаларни ҳал қилиб олди. 38 ёшли ҳужумчи “Интер Майами” билан ҳамкорликни яна уч йилга узайтирганидан кейин халқаро фаолияти бўйича ҳам якуний қарорини айтди.

Лионель Месси Аргентина терма жамоасидаги фаолиятини тўхтатмоқчи экани ва 2026 йилги жаҳон чемпионатида қатнашиши ноаниқ эканини айтганди.

Энди футболчининг фикри ўзгариб, мундиалда тўп тепиш нияти туғилганини айтди.

-  Мен юқори спорт формада бўлиш ва терма жамоада муҳим роль ўйнашни истайман. Жаҳон чемпионатида қатнашишни ўйласам, ҳаяжон босяпти. Биз аввалги жаҳон чемпионатида ғолиб чиққанмиз, энди ана шу унвонни муносиб ҳимоя қилиш ажойиб иш бўларди, - деди Лионель Месси нуфузли манбалардан ҳисобланган Mundo Deportivo нашрига.

Месси Аргентина терма жамоасида 2005 йилдан бери ўйнаб келади. Моҳир футболчи 20 йиллик халқаро фаолияти давомида 195 та учрашувда майдонга тушиб, рақиблар дарвозасини 114 маротаба ишғол қилган.

Лео терма жамоада гол уриш бўйича жаҳон рейтингида Криштиану Роналдудан кейин иккинчи ўринда қайд этилган. Унинг рақобатчиси ҳисобланган 40 ёшли португалиялик юлдуз халқаро майдонда 225 та ўйинда 143 та гол урган.