Мбаппе ва Ямалдан зўри чиқиб қолди

Испания Ла Лигаси расмий сайти янги мавсум доирасида август ойининг энг яхши футболчиси номини эълон қилди. Бу “Вильярреал” ҳужумчиси Николя Пепе бўлди.

Пепе чемпионатнинг дастлабки уч турида рақиблар дарвозасини икки маротаба ишғол қилиб, жамоадошига битта голли пас узатди.

Ивуарлик форварддан ташқари бу индивидуал совринга яна тўрт ўйинчи – “Реал”дан Килиан Мбаппе, “Барселона”дан Ламин Ямаль, “Атлетик Бильбао”дан Нико Уильямс ва “Эспаньол”дан Пере Милья даъвогарлик қилди.

30 ёшли Пепе “Анже” тарбияланувчиси ҳисобланади. Францияда бу жамоадан ташқари “Орлеан” “Лилль”, “Ницца” каби клубларда ўйнаган. Пепенинг юлдузли даври Лондоннинг “Арсенал” клубида ўйнаган йилларга тўғри келди.

Кейинчалик бу ҳужумчи Туркиянинг “Трабзонспор” жамоасида ўйнаб, 2024 йилнинг ёзида эркин агент мақомида “Вильярреал”дан қўним топди.  Шу пайтга қадар испан клубида 31 та учрашувда иштирок этиб, бешта гол ва еттита ассист муаллифи бўлди.