Мбаппе “Реал”га суперфутболчи олиб келади

“Реал” етакчиси Килиан Мбаппе Франция терма жамоаси ҳужум чизиғида ўзи билан бирга ўйнаётган Майкл Олисени шахсан “Қироллик клуби”га таклиф қилди.

Defensa Central нашрининг ёзишича, Мбаппе айни пайтда “Бавария”да ўйнаётган ҳужумкор футболчини олишни сўраб, “Реал” спорт директори Юни Калафатга ҳам мурожаат қилди.

Шунга қарамай, Мадрид клуби раҳбарияти Олисени олишга шошилмайди. Чунки ҳозир жамоа етарлича ҳужумкор футболчиларни жамлаган.

23 ёшли Майкл Олисе Англия футболи грандлари – “Арсенал”,”Челси”, “Манчестер Сити” ҳамда “Рединг” ёшлар жамоаларида ўйнаган. Профессионал фаолиятини 2020 йили “Рединг”да бошлаган. Кейин тўрт йил “Кристал Пэлас”да тўп тепди.

“Бавария” ўнг қанот ҳужумчисини 2024 йилнинг ёзида 53 миллион еврога ўз сафига қўшиб олди. Олисе ўтган мавсум 55 та учрашувда 20 та гол урди, 23 та ассист қайд этди ва мюнхенликлар сафида Бундеслига чемпионлиги ва Германия кубогини қўлга киритди.