Мбаппе "Реал"га ўтади

ПСЖ ҳужумчиси Килиан Мбаппе "Реал"га ўтади. "Sport.fr" нашри хабарига кўра, "қироллик клуби" парижликлар билан 24 ёшли футболчининг трансфери борасида келишиб олган.

Лига 1 чемпиони "қаймоқранглилар"дан яхшигина пул олади, унинг миқдори ошкор этилмаган. "Реал Мадрид"да Мбаппе йилига 35 миллион евро ишлаб топади ва бу французни жамоанинг энг кўп маош олувчи футболчисига айлантиради.

Килианнинг ПСЖ билан амалдаги шартномаси 2024 йилнинг ёзига қадар мўлжалланган. Франция чемпионатининг жорий мавсумида Килиан 14 та ўйинда майдонга тушиб, 15 та гол урди ва 4 та голли узатмани амалга оширди.