Мбаппе “эл-класико”даги ғалабага қандай муносабат билдирди?

Испания чемпионатининг ўнинчи турида “Реал” ўз майдонида мамлакатнинг амалдаги чемпиони “Барселона”ни қабул қилиб, кескин ва муросасиз курашлар остида ўтган учрашувда 2:1 ҳисобида зафар қучди.

Мадридликларнинг голлари Килиан Мбаппе ва Жуд Беллингем ҳисобига ёзилган бўлса, каталонияликлардан Фермин Лопес жавоб тўпини киритди. Мбаппенинг ўзи пенальтидан ҳам фойдалана олмади.

Учрашувдан кейин франциялик футболчи ижтимоий тармоқдаги саҳифаси орқали ўйинга муносабат билдирди.

- Эл-класико — бизники. Жамоанинг энергияси ақлбовар қилмас даражада. Hala Madrid!, - деб ёзди Килиан Мбаппе.

“Эл-класико”дан кейин “Реал” очколари сонини 27 тага етказиб, мусобақа жадвалида пешқадамлик мавқеини мустаҳкамлаб олди. “Барселона” эса, энди мадридликлардан беш очкога ортда қолмоқда.

Килиан Мбаппенинг ўзи Ла Лиганинг жорий мавсумидаги 11-голини нишонлади ва бу кўрсаткич билан чемпионат тўпурарлари пойгасида биринчи ўринда бормоқда.