Машҳур юлдуз бир умрга футболдан ҳайдалиши мумкин

Англия Премьер-лигаси вакили “Вест Хэм”нинг машҳур ўйинчиси Лукас Пакета спорт учрашувларига пул тиккани учун бир умрга футболдан четлатилиши мумкин.

The Athletic нашрининг маълум қилишича, агарда Пакетанинг айби тасдиқланса, футболчига ана шундай оғир жазо қўлланилади.

Манбага кўра, бразилиялик 27 ёшли футболчининг суд жараёни якунланган, бироқ у якуний қарорни олти ҳафта давомида кутишига тўғри келади.

Лукас Пакета “Вест Хэм”да 2022 йилдан бери ўйнаяпти. Якунланган мавсумда ярим ҳимоячи 36 та учрашувда майдонга тушиб, бешта гол урди.

Футболчининг “болғаурарлар” билае амалдаги шартномаси яна икки йил давом этиши белгиланган.  Transfermarkt портали экспертлари унинг трансфер нархини 28 миллион еврога баҳолаган.