“Манчестер Сити” рекорд трансферни амалга оширади

“Манчестер Сити” мутасаддилари жамоа таркибига ёш истеъдодларни жалб қилишда давом этмоқда. Клубнинг навбатдаги хариди Сверре Нюпан бўлади.

18 ёшли норвегиялик ярим ҳимоячи “Русенборг” жамоаси ўйинчиси ҳисобланади. “Шаҳарликлар” бу клубни Нюпанни сотишга кўндирди.

The Athletic нашрининг маълум қилишича, бу трансфер учун манчестерликлар 14,6 миллион евро тўлайди.  Қизиғи шундаки, бу сумма Норвегия учун рекорд ҳисобланади. Бу мамлакат ички чемпионатида ҳали ҳеч бир футболчи учун бунақа нархда пул тўланманган.

Англия суперклуби янги истеъдод билан 2030 йилнинг ярмигача давом этадиган шартнома имзолайди. Трансфер якунланганидан кейин Нюпан тажриба ошириши учун бошқа клубларга ижарага берилади.