“Ман Сити” собиқ футболчиси Неймарнинг обрўсини ер билан битта қилди

Аввалроқ “Манчестер Сити”да ўйнаган Тревор Синклер ПСЖ ҳужумчиси Неймар ҳақида гапирди. У собиқ клуби раҳбариятига бразилиялик форвардни жамоага таклиф қилмаслик кераклигини айтди.

“Менинг фикримча, Неймар жуда беқарор футболчи. У бир баҳсда яхши ўйин кўрсатиши мумкин, аммо у кейинги қолган 3 та учрашувда деярли майдонда кўринмай қолади. Мен уни Стерлинг билан солиштирган бўлардим, лекин Раҳим тўртта ўйиндан учтасида яхши ҳаракат қилади.

Албатта, Стерлинг ҳам ҳар бир баҳсда яхши ўйин намойиш этмаслиги мумкин. Аммо Неймарга қараганда барқарор”, - дейди Синклер.

Эслатиб ўтамиз, Неймар 2017 йилдан бери ПСЖда ўйнаб келмоқда. Бразилиялик футболчи 144 та ўйинда 100 та гол урган.