“Ливерпуль” бешта гол билан тарихий чемпионликка сазовор бўлди

Арне Слот бош мураббийлик қилаётган “Ливерпуль” футболчилари миллий чемпионатнинг 34-турида йирик ҳисобда зафар қучиб, муддатидан аввал Англия чемпионлигига сазовор бўлди.

Учрашув мезбонлар учун омадсиз бошланди ва беллашувнинг 12-дақиқасида Соланке “Тоттенхэм”ни ҳисобда олдинга олиб чиқди. Бироқ қолган дақиқаларда “қизиллар”ни тўхтатиб бўлмади.

Танаффусгача Диас, Мак Аллистер ва Гакпо “шпорлар” дарвозасини уч бор ишғол қилди. Ўйиннинг иккинчи ярмида Муҳаммад Салоҳ гол урди. 69-дақиқада рақиб футболчиси Удоджи ўз дарвозасига тўп киритиб қўйди.

Беллашувда 5:1 ҳисобида зафар қучган ливерпулликлар Премьер-лига жадвалида энг яқин таъқибчиси “АРсенал”дан 15 очкога ўтиб кетди ва чемпионликни расмийлаштирди.

Шу тариқа, “Ливерпуль” футболчилари йигирмачи маротаба мамлакат чемпионлигига сазовор бўлди ва бу кўрсаткич бўйича рекордчи “Манчестер Юнайтед”га тенглашиб олди. Манчестерликлар сўнгги бор чемпионликни 2013 йили нишонлаган.

Чемпионатда ғолиб чиқиш бўйича учинчи ўрин “Арсенал”га тегишли бўлиб, “канонирлар” жами 13 маротаба бош совринга эга чиққан эди.

Абдуқодир Ҳусановнинг “Манчестер Сити” жамоаси бу гал чемпионликни топшириб қўйди. “Шаҳарликлар” кетма-кет тўрт маротаба Премьер-лига ғолиби бўлган ягона жамоа ҳисобланади. Уларнинг ҳисобида жами 10 та чемпионлик бор.