Levandovski Flikning katta xatosini aytdi

“Barselona” Ispaniya chempionatining 18-turida o‘z maydonida asosiy raqobatchilaridan “Atletiko”ga 1:2 hisobida yutqazib qo‘ygan edi.

Bu o‘yinda hisobni mezbonlar ochganiga qaramay, madridliklar o‘yin oxirigacha ikkita to‘p kiritdi. G‘alaba to‘pi to‘xtalishlar uchun qo‘shib berilgan oltinchi daqiqada kiritildi.

“Barselona” hujumchisi Robert Levandovski mag‘lubiyatga sabab bo‘lgan omil haqida o‘z qarashlarini bildirdi. Bu ko‘proq bosh murabbiy Xans-Diter Flik qo‘llagan taktikaga bog‘liqligini yashirmadi.

- “Atletiko”ga qarshi bahsning oxirida biz bu xuddi finaldek, unda yutqazayotgandek va nima qilib bo‘lsa ham, hisobni tenglashtirishimiz shartdek  o‘ynashimizga to‘g‘ri keldi. Ba’zan uchrashuvda g‘alaba qozona olmasang, hech bo‘lmasa durang natijani ushlab qolish uchun harakat qilish kerak. Bu taktik mavsum davomida bir necha bor bizga pand berdi, - dedi Robert Levandovski.

Bu mag‘lubiyatdan keyin “Barselona” uchinchi o‘ringa tushib qoldi. Dastlabki ikki pog‘onani ashaddiy raqiblar – Madridning “Atletiko” va “Real” klublari egallab oldi.