"Клоппни танлаган бўлардим" - ўзбекистонлик мутахассис Бенту ва Кападзе ҳақида

Куни кеча юртимизга португалиялик мутахассис Пауло Бентунинг келиши ортидан миллий терма жамоамизга айнан ушбу мутахассисни бош мураббий этиб тайинланиши ҳақидаги гап-сўзлар авж олмоқда.

Айни пайтдаги бош мураббий Тимур Кападзенинг масаласи эса Бенту фонида очиқ қолаётгандек. Ҳозирча ЎФА бу борада ҳеч қандай расмий хабар бергани йўқ.

Пауло чиндан ҳам терма жамоамизни бошқарадими ёки Кападзени ўзи ишлашда давом этадими? Бу масалада футболимиз жамоатчилиги ҳам қизғин муҳокамаларни олиб бормоқдалар. Ушбу вазият бўйича Sports.uz журналисти Жаъфар Ирисметовнинг фикрларига қизиқиб кўрди.

- Жаъфар ака, охирги пайтларда асосий мавзуга айланган масала - бу Пауло Бентунинг юртимизга келишидир. Терма жамоамизга Бенту бош мураббий этиб тайинланиши кутилаётган бир пайтда сиз бу масалага қандай қарайсиз?

- Нима ҳам дердик, Бентуни чақиришибди. Машарипов айтган гап-да, раҳбарият шуни тўғри деб ҳисоблаётган бўлса, демак шу тўғри бўлса керак-да. Лекин Кападзе масаласи кўтариляпти, буни ЎФА раҳбарлари ҳал қилишади.

- Тимур Кападзе бош мураббий постида қолгани маъқулми ёки сизнингча, янги хорижлик топ даражадаги мутахассис керакми, бизга?

- Тўғрисини айтсам, бу саволга ЎФА жавоб берса тўғри бўларди. Бу масалада мени нимадир дейишим қийин. Фикрлар ҳар хил. Кападзе қолгани яхшими, четдан мураббий келгани маъқулми ёки иккаласини бирлаштириш керакми?! Бунга ЎФАга алоқадор мутахассислар жавоб бергани яхши.

- Агар бизга хорижлик мураббий зарур бўлса, сиз кимни танлаган бўлардингиз ва нима учун?

- Хорижлик мураббий керак бўлганида менимча ҳозирда бўш юрганларидан оладиган бўлсак, Юрген Клопп бор. Шу мураббийни танлаган бўлардим. Ваҳоланки, ўзим “барса”чиман ва Гвардиолани иш услубини ёқтираман. Клоппга ўхшаган мураббий бўлса яхши бўларди.

- Умуман олганда, Бенту ҳақидаги фикрингиз қандай? Сизнингча, у қандай мураббий?

- Пауло Бенту ўзига яраша обрўли мураббий. Лекин катта пулга эга бўлган БААда ҳам натижа бера олмади. Қисқа муддат ичида натижа келтириш жуда қийин. Агар вақт бўлса, бошқа гап. Бир йил жуда қисқа муддат. Бенту ҳақида нимадир дейишим қийин. Уни фаолиятини яхши кузатмаганман. Баҳо бериш учун уни кўпроқ кўриш керак. Жаҳон чемпионати бошланишига бир йил қолди. Бундай пайтда нимадир айтиш қийин. Бизни футболчиларни ўрганишига анча вақт кетиб қолади.