Каземиронинг номи “Манчестер Юнайтед” тарихидан ўчмайдиган бўлди

Англия Премьер-лигасининг бешинчи туридан ўрин олган “Манчестер Юнайтед” ва “Челси” ўртасидаги учрашув бразилиялик футболчи Каземиро номини манчестерликлар тарихига муҳрлади.

Рубен Аморим шогирдларининг 2:1 ҳисобидаги қийин ғалабаси билан якунланган учрашувнинг 37-дақиқасида Каземиро жамоасининг иккинчи голига муаллифлик қилди. Танаффусга чиқиш олдидан эса, бразилиялик юлдуз иккинчи марта сариқ карточка олиб, майдонни эрта тарк этишга мажбур бўлди.

Шундан кейин  Каземиро “Манчестер Юнайтед” тарихида Премьер-лига учрашувининг биринчи бўлимида гол урган ва майдондан ҳайдалган биринчи футболчи бўлди.

Каземиронинг клуб билан амалдаги шартномаси жорий мавсум охирида якунланади. Transfermarkt портали машҳур ярим ҳимоячининг трансфер нархини 10 миллион еврога баҳолаган.