Жейдон Санчо Италиянинг гранд клубига ўтади: трансфер яқин кунларда расмийлаштирилади

"Ювентус" Жейдон Санчони ўз сафига қўшиб олиш арафасида турибди. Англиялик ҳужумчи билан шахсий шартномага келишувга эришилган — у клуб билан тўрт йиллик шартнома тузади ва йилига 6 миллион евро маош олади (бонуслардан ташқари).

Келишув бўйича сўнгги тафсилотлар ҳал этилмоқда. Туринликлар футболчи агентлари билан музокараларни якунлаб, яқин кунларда трансферни эълон қилишни режалаштирмоқда.

Санчо аллақачон "Манчестер Юнайтед" режаларидан чиқариб ташланган. У Швециядаги "Лидс"га қарши ўртоқлик ўйини учун таркибга киритилмаган ва клубнинг АҚШдаги ёзги турнирида ҳам қатнашмайди.

Аввалроқ А Серия клуби Санчо учун 15 миллион фунт таклиф қилган эди. Энди эса туринликлар бонуслар ва чиқиш пулининг бир қисмини ўз зиммасига олиш орқали МЮни рози қилишга ҳаракат қилмоқда. Футболчининг ўзи ҳам италияликлар сафига қўшилиш учун маошини икки баробарга қисқартиришга тайёрлигини билдирган.