Жаҳон футболининг энг ёрқин таланти ўзига жамоа танлади

Европанинг бир неча гранд клублари нишонида турган “Байер” етакчиси Флориан Вирц фаолиятини нуфузли совринлар учун курашадиган қудратли жамоада давом эттиришга қарор қилди.

22 ёшли ҳужумкор футболчини қўлга киритиш учун “Реал”, “Ливерпуль” ва “Манчестер Сити” охиригача кураш олиб борди. Бироқ ўйинчининг ўзи Бундеслигадан узоқлашмасликни маъқул топди.

Журналист Саша Тавольерининг маълум қилишича, Флориан Вирц Бундеслиганинг энг бақувват клуби “Бавария”ни танлади.

Вирц ўтган мавсум “Байер”ни ўз тарихида илк бор Германия чемпионлигини қўлга киритишига катта ҳисса қўшган эди. Леверкузенликлар бош мураббийи Хаби Алонсо бундан буён “Реал”ни бошқарадиган бўлди.

Аксарият экспертлар Флориан Вирц ҳам қадрдон устози ортидан Мадридга йўл олиши мумкинлигини тахмин қилганди. Лекин истеъдодли ўйинчининг танлови кутилмаган бўлди.