Hamma ayb murabbiydami?

Xabaringiz bor, 8-26 yanvar kunlari Tailandda 23 yoshgacha futbolchilar o‘rtasida Osiyo chempionati o‘tkazildi. Ushbu musobaqada sovrindorga aylanganlar Olimpiadaga yo‘llanma olishdi.

Chempionatda qatnashgan O‘zbekiston olimpiya terma jamoasi 4-o‘rin bilan kifoyalandi. Muhim o‘yinlarda dadillik etishmadi. Natijada yana yo‘llanmadan mosuvo qoldik.

Umidlari sarobga aylangan muxlislarning aksariyati jamoa bosh murabbiyi Lyubinko Drulovichni tanqid qilyapti, ba’zilar esa 2-3 futbolchiga e’tiroz bildirmoqda.

Biz esa chempionatdagi o‘yinlarimizga to‘xtalamiz, o‘z fikr va mulohazalarimiz bilan o‘rtoqlashamiz.

O‘zbekiston olimpiya terma jamoasi guruh bosqichida ko‘pchilikni havotirga solgani bor gap. 3 turda 3 xil natija. Eng yomoni kuchli jamoalardan 1 ochko oldik, xolos.

Dastlabki uchrashuvda Eron bilan arang durangga erishdik. Garchi birinchi bo‘lib hisobni ochsak-da, ikkinchi 45 daqiqalikda gol o‘tkazib yubordik. Bellashuvda ustunlik asosan forslar tomonida bo‘ldi. Ular xohlagan paytda bosimni oshirib, vakillarimizni ortga chekinishga majbur qilishdi.

Xitoy bilan bahsda futbolchilarimiz tamomila boshqacha o‘yin namoyish etishdi. 2 ta gol urdik. Yana bir marta darvozani ishg‘ol etishimiz mumkin edi. Biroq Islomjon Qobibilov penaltini Jasurbek Yaxshiboevga berganida, balki bellashuv yirik hisob bilan tugashi mumkin edi.

Ammo himoyachimiz shu kuni 11 metrli jarima zarbalarining ikkinchisidan naf chiqara olmadi. Bu yaxshiyamki, jamoa sardoriga ruhiy tomondan ta’sir qilmadi.

Mazkur bellashuvda zaxiradan tushirgan Nurillo To‘xtasinov jamoa joniga oro kirdi. U kerakli pallada kerakli joyda paydo bo‘ldi va darvozaga chiroyli tarzda to‘p yo‘lladi.

Janubiy Koreyaga qarshi uchrashuvda ustunlik to‘laligicha raqib tomonda bo‘ldi. Ular istagan paytda hujumga o‘tishdi va gol urishdi. Baxtimizga, koreyaliklar yo‘llagan yana ko‘plab zarbalar noaniq ketdi. Aks holda kamida ikki yil avvalgi 4:1 hisobi bu safar raqib foydasiga qayd etilarmidi?!

Koreyaliklar 2-turda guruh bosqichidan chiqish vazifasini hal etishgandi. O‘zbekistonga qarshi bellashuvda ham ular professinallarcha harakat qilishdi. Umuman olganda, murabbiy har tur tarkibda ko‘plab futbolchilarni almashtirib turdi. Safidagi barcha o‘yinchilar asosiy tarkibga kirishga munosib ekanliklarini ko‘rsatdi. Buni jamoa ustozi ham ta’kidladi. Murabbiy qo‘l ostidagi barcha futbolchilarga imkoniyat berishga urinishini aytib o‘tdi va buni amalda isbotladi.

Bizning ustozlarimiz asosiy tarkibni almashtirishni ep ko‘rishmadi. Aynan mana shu futbolchilar bir-birini yaxshi tushunib harakat qilishlari hamda vazifani uddalashlariga ishonch bildirishdi.

Chorak finalda BAAni yirik hisobda taslim etdik. Bu uchrashuv va guruhda omad bizga ko‘p bora kulib boqqanidan qolgan bahslarda u bizdan yuz o‘g‘irgandek. Chunki xavfli vaziyatlar yaratsakda, Saudiya Arabistoni va Avstraliyaga qarshi bellashuvlarda darvozani ishg‘ol qila olmadik. Xatto 2-3 metrlardan ham.

Guruh bosqichida 3 o‘yinda 4 gol urdik. Ulardan ikkitasi penaltidan. Har uchrashuvda darvozani ishg‘ol qildik. Bu yaxshi. Biroq grandlarga qari bahsda nursiz o‘yin ko‘rsatganimiz, mag‘lubiyatga uchraganimiz, himoyadagi qo‘pol xatolar qimmatga tushdi.

Shu o‘rinda ko‘pchilikda bir xil savol tug‘ildi: tarkibda 23 futbolchi bo‘lgani holda nima uchun ulardan foydalanilmadi? Nega asosan bitta tarkib bilan uchrashuvlarni boshladik? Bu murojaatlarga murabbiy matbuot anjumanlarida kim tayyor bo‘lsa, shu maydonga tushganini aytdi. Balki Drulovich haqdir. Chunki u o‘yinchilarni bizdan ko‘ra yaxshi bilar. Yoki siz o‘ylagan fikrlar to‘g‘ridir.

Natija qoniqarli emasligi va vazifa uddanmagani nuqta’iy nazardan murabbiy aybdor. U natijaga javob beradi. Biroq uning qo‘l ostidagi jamoa yomon o‘ynamadi. Ko‘plab vaziyatlar yaratdi. Faqatgina futbolchilar imkoniyatlardan foydalana olmadi. Hujumchiga sovuqqonlik etishmadi. Jumladan Bobir Abdixoliqovga. Qolaversa, Jasurbek Yaxshiboev aksariyat hollarda o‘zini ko‘rsatish uchun o‘ynagani hech kimga sir emas. Jarima maydoni ichida sheriklari bo‘la turib, o‘zi zarba bergan paytlari ko‘p bo‘ldi. Agarda o‘z imkoniyatlarimizdan foydalanganimizda hozir hammasi boshqacha kecharmidi?! Hech kim murabbiyni nega boshqa futbolchilarni vaqtida maydonga tushirmadi, demas edi ham.

Vaziyatlar yaratildi, hujumlar tashkil etildi, kuchli raqiblar bilan tengma-teng ayrimlaridan ustun o‘ynadik (Janubiy Koreya bundan mustasno). Demak, murabbiy jamoa o‘yinini yo‘lga qo‘ygan. Saudiya doimgidek, o‘zining ayyor o‘yini orqali g‘alabaga erishgan bo‘lsa, Avstraliya taktika evaziga zafar quchdi.

Bu fikrlar bilan Lyubinko Drulovich aybdor emas yoki yuqorida tilgan olingan futbolchilar xato qildi, demoqchi emasman. Faqatgina bu erda xatoni mutaxassislar boricha gapirib, izohlab berishsa ayni muddao bo‘lardi. Ayniqsa, nega biz oxirgi daqiqalarda mag‘lub bo‘lishimiz va muhim qadamni tashlay olmasligimiz borasida. Kamchiliklarimizni bartaraf qilmasak, mana shunday yo‘llanmalardan chetda qolaveramiz.

Endi navbat mutaxassislarga...!!!