Гвардиола Холандга янги вазифа қўйди

“Манчестер Сити” бош мураббийи Хосеп Гвардиола норвегиялик форвард Эрлинг Холандга янги вазифа юклади. Испаниялик мутахассис 25 ёшли футболчининг Европа Чемпионлар лигаси тарихидаги энг зўр тўпурарга айланишини истаяпти.

Гап шундаки, Европа Чемпионлар лигасининг умумий босқич биринчи турида Холанд “Наполи” дарвозасини ишғол қилди. Шу тариқа, Эрлинг мусобақа тарихида 50 та гол уриш учун энг кам ўйин сарфлаган футболчи бўлди. Бу маррани забт этиш учун унга 49 та учрашув кифоя қилди холос.

Холанд аввалги рекордни 13 та учрашув янгилади. Бунгача рекорд натижа Чемпионлар лигасида 50 та голни 62 та ўйинда киритган Рууд Ван Нистелройга тегишли эди.

Энди Хосеп Гвардиола шогирди мусобақа тарихидаги энг зўр тўпурар бўлишига ишоняпти. Бунинг учун Холанд қитъа миқёсидаги энг нуфузли турнирда камида 141 та тўп киритиши керак. Амалдаги рекорд соҳиби Криштиану Роналду Чемпионлар лигасида жами 140 та гол муаллифи ҳисобланади.

- Бу кетишда Холанд Роналдунинг рекордини уриши мумкин. Агар Эрлинг жиддий жароҳат олмаса, яна 10-12 йил юқори савияда тўп тепа олади. Унинг гол уриш темпини инобатга олса, рекордни янгилаш эҳтимоли юқори.

Унинг кўрсаткичлари ҳамма нарсани очиқ-ойдин кўрсатиб турибди. Холандни олганимиз бахтимиз. Рууд ван Нистелрой, Роберь Левандовски, Лионель Месси ва Криштиану Роналду каби даҳолар сафига қўшилиш Эрлинг учун ақлбовар қилмас ютуқ бўлади, - деди Хосеп Гвардиола.