Гави "Реал" устидан қозонилган ғалабадан сўнг провокацион ҳаракатлари билан эътибор марказида бўлди

"Барселона" ярим ҳимоячиси Гави Испания Кубоги финалидаги ғалабадан сўнг майдонда ва унинг ташқарисидаги ҳаракатлари билан мухлислар ва ОАВ диққатини тортди. 

"La Razon" нашрининг хабар беришича, "Барселона" финалда "Реал"ни 3:2 ҳисобида мағлуб этгач, 20 ёшли Гави дарҳол мадридликлар ҳимоячиси Рауль Асенсио томон йўл олиб, ғалабасини унинг олдида нишонлаган.

Ўйин якунлангач, Гави мухлислардан бири узатган байроқни олди. Унда "Гави ёки қўрғошин. Антимадридчилар" деб ёзилган эди. Бу ёзув машҳур жиноятчи Пабло Эскобарнинг "кумуш ёки қўрғошин" шиорига ишора бўлиб, мадридликларга қарши муросасиз кайфиятни билдиради.

Футболчи ушбу байроқни белига боғлаб олган ҳолда майдонни тарк этди ва шу ҳолда "Барселона"нинг кийиниш хонасига ҳам кирди.