Гасперини "Аталанта"ни нега тарк этгани ҳақида тўлиқ гапирди

"Жан Пьеро Гасперини – замонавий “Аталанта”нинг асосий меъмори – клуб бош мураббийи лавозимини тарк этишини эълон қилди. У бу ҳақда хайрлашув хатида маълум қилди:

"Фақат сўнгги соатлардагина мен бу тўққиз йиллик ажойиб тарихга якун ясашга қарор қилдим. Аммо келинг, буни хайрлашиш демайлик. Менга бу сўз ёқмайди" – дея таъриф бериб ўтди. 

Гасперини қарорни шахсан ўзи қабул қилганини ва клуб раҳбарияти бу ишга алоқаси йўқлигини таъкидлади. У "Аталанта"ни юқори нуқтада қолдирмоқда — А Серияда 3-ўрин ва Чемпионлар лигаси йўлланмаси. Шунингдек, клуб тарихидаги илк халқаро соврин — 2024 йилда қўлга киритилган Европа Лигаси ғалабаси ҳам унинг ҳиссасига тўғри келади.

"Мен фақат бу қадамни қўйиш вақти келганини англаб етдим... Бу қийин, аммо катта ва ҳайратланарли чақириқ. У менга катта адреналин беради" – дея қўшимча қилди мураббий.

Гасперини 2016 йилдан бери "Аталанта"ни бошқариб келаётган эди. Унинг қўл остида клуб ҳужумкор ўйин услуби билан ном қозонди, кўплаб ёш истеъдодлар юзага чиқди ва жамоа мунтазам равишда Европа мусобақаларида иштирок эта бошлади.

Эслатиб ўтамиз, Гасперини бергамоликларни тарк этганидан сўнг Римнинг "Рома" клубига бош мураббий этиб тайинланмоқда.