Фримпонг: "Романо менинг режамни бузди"

"Ливерпуль"нинг янги футболчиси Жереми Фримпонг ўзининг инглиз клубига ўтиши ҳақидаги маълумот барвақт ошкор бўлгани тўғрисида қизиқарли воқеани айтиб берди.

Футболчининг сўзларига кўра, инсайдер Фабрицио Романо бу хабарни эълон қилганда, у ҳали отасига айтишга ҳам улгурмаган экан. Фримпонг болалигидан "Ливерпуль" мухлиси бўлган отасига сюрприз қилмоқчи бўлганини тан олди. Бироқ, ижтимоий тармоқларда маълумотлар тарқалгач, у ҳақиқатни айтишга мажбур бўлди.

- Отам "Ливерпуль" ишқибози, шунинг учун бутун оиламиз билан унга сюрприз қилмоқчи эдик. Миш-мишлар тарқалганида, мен: "Дада, бу ёлғон," дедим. Аммо Романо бу ҳақда ёзгач, яширишнинг иложи қолмади. Дадам дарҳол тушунди ва тўғридан-тўғри сўради. Мен: "Ҳа, "Ливерпуль"га ўтяпман" дедим. У шунчаки ишонолмай қолди! - дея Фримпонгнинг сўзларини келтиради "This is Anfield" нашри.

Ҳимоячи ёзда "Ливерпуль"га "Байер"дан келиб қўшилди. Фримпонг Бундеслиганинг ўтган мавсумида 33 та ўйинда майдонга тушиб, бешта гол урди ва худди шунча голли узатма берди.